المكونات
=====
=====
انا بقول مكونات مش مقادير لان كل حد براحته فى الكميات
لحم فلتو
كوسة
1بطاطس
طماطم
بصل
فلفل رومى
توم مفروم
معلقه صغيره زبده
2 معلقة صلصه
2 مكعب مرقه
توابل ( ملح-فلفل أسود-بهارات لحم-جنزبيل مطحون-ورق لورى مطحون)
الطريقه
====
====
نقطع اللحم قطع صغيره انا استخدمت فلتو علشان مش بياخد وقت فى النضج
فهياخد نفس وقت نضج الكوسة
لكن لو هستخدمى نوع لحم بياخد وقت
يا ريت تقومى بسلقه نص سلقه قبل وضعها مع الكوسة
وتقومى بنفس الخطوات القادمه (بسسسس تكون اللحمه نص سلق)
ننضف الكوسة ونغسلها ونقطعها حلقات
نقطع الطماطم والبصل والفلفل الرومى مكعبات
ومعهم معلقه توم مفروم
نضع 2 معلقة كبيره صلصه و2 مكعب المرقه والتوابل
نضع كوب كبير مايه على الخلطه ونقبلهم
نقطع 1 حبه كبيره بطاطس و1 حبه كبيره بصله شرائح
فى صينيه او طاجن او بيركس اللى يعجبنا
نضع شرائح البطاطس والبصل ( الخطوه دى اختيارى )
لان انا بصراحه حطاها حمايه للحمه احسن تتحرق ههههههههه
انا متأكده ان ده مش هيحصل بس علشان الوسواس القهرى
اللى عند روشا يبطل يوسوس ويرتاح شويه والصينية فى الفرن ههههههههه
نضع اللحمه فوق البطاطس
نضع جزء من الخلطه السابق تحضيرها
فوق اللحمه اللى فوق البطاطس
نضع الكوسة فوق اللحمه
نضع باقى الخلطه كلها فوق الكوسة
نضع المعلقه الصغيره الزبده ( معلقة صغيره علشان تبقى خفيفه )
وانتى برضه براحتك يا قمره فى كميه الدهون
ونغطى الصينيه بالفويل
وندخلها الفرن حوالى ساعه الا ربع او ساعه على حسب فرنك يا قمر
لحد ما تستوى ولما توصل للسوى المطلوب نشيل الفويل
وندخلها الفرن تانى تكمل سوى وتتشرب
لحد ما يتحمر وجهها
وبالهنا والشفا